Фактчекnews | Вазорати тандурустӣ: 1890 нафар ба карантин фаро гирифта шуданд

0
456
binoi Vazorati tandurusti
АКС: Вазорати тандурустӣ ва ҳифзи иҷтимоии аҳолии Тоҷикистон

Вазорати тандурустӣ ва ҳифзи иҷтимоии аҳолии Тоҷикистон гуфтааст, аз 1-уми феврал то 18-уми марти соли равон 1890 нафар шаҳрвандоне, ки аз кишварҳои хориҷ ба Тоҷикистон ворид гардидаанд, ба карантин фаро гирифта шудаанд.

Ба иттилои Вазорати тандурустӣ, аз ин шумора то санаи зикргардида 1426 нафари онҳо ба хонаҳояшон рухсат дода шуда, айни ҳол 464 нафарашон дар беморхонаҳои сироятии мамлакат ба карантин фаро гирифта шудаанд.

Ин ниҳод мегӯяд, дар баробари шаҳрвандоне, ки аз кишварҳои Чин, Куриёи Ҷанубӣ, Итолиё, Эрон ва Афғонистон ба Тоҷикистон ворид мешаванд, ҳамзамон, шаҳрвандоне, ки аз кишварҳои Фаронса, Испониё, Шветсия, Швейтсария, Бритониё, Норвегия, Нидерланд, Олмон, Белгия, Дания ва Иёлоти Муттаҳидаи Амрико бевосита ва тавассути дигар давлатҳо ба қаламрави Ҷумҳурии Тоҷикистон ворид мегарданд, давоми 14 рӯз ба карантин фаро гирифта хоҳанд шуд.

Зимнан, Вазорати тандурустӣ ва ҳифзи иҷтимоии аҳолии Тоҷикистон аз тамоми сокинони мамлакат даъват намудааст, ки ба ҳар гуна хабару овозаҳои бардурӯғ вобаста ба сирояти коронавирус, ки гӯиё дар Тоҷикистон ба қайд гирифта шудааст, бовар нанамоянд.

Коронавирус, ки охири моҳи декабри соли гузашта дар шаҳри Вуҳани Чин пайдо шуд, тибқи иттилои Созмони ҷаҳонии тандурустӣ (СҶТ) ба санаи 18.03.2020, шумори умумии сироятёфтагон ба коронавирус 191 127 нафар ва теъдоди фавтидагон ба 7 807 нафар расидааст.


Журналист-далелсанҷ ва медиа-тренер. Мутахассис оид ба медиаи нав. Ҳаммуассиси нахустин платформаи далелсанҷии Тоҷикистон Factcheck.tj ва платформаи иттилоотии ZiraMedia.
Дастпарвари шӯъбаи рӯзноманигорӣ ва назарияи тарҷумаи факултаи филологияи тоҷики Донишгоҳи давлатии Хуҷанд ба номи академик Бобоҷон Ғафуров (2003-2008). Таҷрибаи журналистии худро дар ВАО расман аз соли 2007 оғоз кардааст. Дар бахши рӯзноманигорӣ таҷрибаи 15-сола ва ҳамчун медиа-тренер таҷрибаи беш аз 5-сола дорад.
Аз соли 2012 ба таҳқиқоти журналистӣ ва аз соли 2014 бо журналистикаи чандрасонаӣ машғул аст.
Феълан, сармуҳаррири сомонаи Factcheck.tj мебошад.

Шарҳи худро гузоред