Чӣ санҷида шуд?
18-уми декабри соли равон хабаргузории Sputnik Тоҷикистон матлаберо таҳти унвони «Донишгоҳи миллии Тоҷикистон дар қатори беҳтарин донишгоҳҳо ворид шуд» («Таджикский национальный университет вошел в число лучших вузов») нашр намуд (бойгонӣ). Дар хабар омадааст, ки Донишгоҳи миллии Тоҷикистон (ДМТ) ба феҳристи беҳтарин муассисаҳои таҳсилоти олии Аврупои Шарқӣ ва Осиёи Марказӣ шомил шудааст.
Иқтибос:
«Тибқи радабандии ширкати бритониёии Quacquarelli Symonds (QS) ДМТ дар ҷойи 241-ум қарор гирифтааст. Дар маҷмӯъ, рӯйхат 450 донишгоҳи беҳтаринро дар бар мегирад».
Ҳукмнома: Ҳақиқат
Воқеан ҳам тибқи радабандии ширкати бритониёии Quacquarelli Symonds (QS) Донишгоҳи миллии Тоҷикистон мақоми 241-умро соҳиб шудааст.
Чӣ гуна санҷида шуд?
Хабаргузории Sputnik Тоҷикистон, ки ин маълумотро дар такя ба сомонаи Quacquarelli Symonds (QS) нашр кардааст, мавриди санҷиш қарор додем. Маълум шуд, ки тибқи радабандии мазкур, аз миёни 450 муассисаи таҳсилоти олии Аврупои Шарқӣ ва Осиёи Марказӣ Донишгоҳи миллии Тоҷикистон мақоми 241-умро касб намудааст (бойгонӣ).
Хулоса
Санҷиш нишон дод, ки матлаби хабаргузории Sputnik Тоҷикистон саҳеҳ буда, ҳукмномаи «Ҳақиқат»-ро мегирад.
Ганҷина РУҲУЛОВА
