Дасткорӣ | Толибон* ба Тоҷикистону Ӯзбекистон: «Сабри моро лабрез накунед!»

0
150

Чӣ санҷида шуд?

12-уми январи соли равон хабаргузории «REPUBLICWORLD.COM»-и Ҳиндустон хабареро зери сарлавҳаи «Сабри моро лабрез накунед»: Толибон* аз Тоҷикистону Ӯзбекистон хостанд, ҳавопаймоҳои Афғонистонро баргардонанд, вагарна ба амали ҷавобия рӯ ба рӯ мешаванд» нашр кардааст (бойгонӣ). Дар он Толибон* аз Тоҷикистон ва Ӯзбекистон хостаанд, ки ҳавопаймоҳо ва чархболҳои марбут ба Афғонистонро баргардонанд.

Иқтибос:

«Ман аз (Ӯзбекистон ва Тоҷикистон) эҳтиромона хоҳиш мекунам, ки сабри моро лабрез накунанд ва (барои бозпас гирифтани чархболҳо) тамоми чораҳои ҷавобии имконпазирро наандешанд», – гуфтааст вазири дифои Толибон* Яъқуб Муҷоҳид».

Ҳукмнома: Дасткорӣ

Хабаргузории «REPUBLICWORLD.COM» бо такя ба TOLOnews ин иқтибосро овардааст (бойгонӣ), вале ин хабаргузорӣ чунин иқтибосро нашр накардааст.

Чӣ гуна санҷида шуд?

Мо тариқи ҷустуҷӯи Google маълум кардем, ки хабаргузориҳои дохилӣ ва хориҷие, ба монанди Sputnik tj, Азия-Плюс, ТАСС ва дигар расонаҳо ба ин монанд хабарро нашр кардаанд, вале ин хабаргузориҳо низ аз иқтибосе, ки мавриди санҷиш қарор додаем, чизе нанавиштаанд.

Хабаргузории TOLOnews, ки расонаи расмии Афғонистон ба ҳисоб меравад, дар мавриди баргардонидани чархболҳо аз забони иҷрокунандаи вазифаи вазири мудофиаи Афғонистон Яъқуб Муҷоҳид навиштааст (бойгонӣ): «Чархболҳое, ки чӣ дар Тоҷикистон ва чӣ дар Ӯзбекистонанд, бояд баргардонида шаванд. Мо иҷоза намедиҳем, ки ин чархболҳо дар берун бимонанд ва ё аз онҳо истифода баранд».

Ҳамзамон, ӯ ҳушдор додааст, ки агар ин кишварҳо чархболҳои Афғонистонро барнагардонанд, ба паёмадҳои баде рӯ ба рӯ хоҳанд шуд.

Хулоса

Дарвоқеъ, толибон ибораи дар иқтибос бударо, ки «Ҷониби Тоҷикистону Ӯзбекистон сабри моро лабрез накунанд» аст, нагуфтаанд. Аз ин хотир, санҷиши мо ҳукмномаи «Дасткорӣ»-ро мегирад.


Ба Telegram-канали мо обуна шавед ва танҳо маълумоти боэътимодро ба даст оред! Моро дар дигар шабакаҳои иҷтимоӣ низ бихонед!


Муфассалтар бо ҳукмномаҳои мо ва тафсироти онҳо метавонед дар саҳифаи «Ҷадвали ҳукмномаҳо» шинос шавед. Дар ҳолати норозигӣ бо ҳукмномаҳои баровардаи мо нисбати ягон мавод, хабар ё суханони санҷидаи мо, метавонед дар тамос шуда, исботи нодурустии онро пешкаш намоед. Дар ҳолати зарурӣ имконияти бозбинии ҳукмномаҳо вуҷуд дорад.

Журналист-далелсанҷ. Соли 2015 Донишгоҳи миллии Тоҷикистонро бо ихтисоси "журналист" хатм кардааст. Аз соли 2013 инҷониб бо васоити ахбори омма ҳамкорӣ дорад. Иштирокчии чандин семинару тренингҳо оид ба санҷиши далелҳо мебошад.

Шарҳи худро гузоред